Las campanas

Son dalgo inseparable del pueblu ya tienen un ciertu poder de misteriu

Nunca meyor época pa escribir sobre campanas que nestas fechas. Casique nun habrá naide que nun conoza o tararie nestas fechas el popular ya al.legre villancicu «Campanas de Belén», que deprendimos de pequenos. La campana ya ún de los símbolos de la Navidá. El toque de campanas da-y solemnidá a momentos señalaos. Pero, d'outra miente, ya un de los elementos sonoros que vei pouco a pouco enmudeciendo. Foi perdiendo protagonismu colos cambios que socedieron nos pueblos ya ciudades nas últimas décadas, sobre too, cola chegada de las nuevas teunoloxías. Sicasí, las campanas siguen mirándonos dende las alturas ya conservan el sen máxicu que siempre tuvieron. Anque agora seya más de ralo en ralo, el toque de campanas espierta sensaciones más ou menos prestosas, según el momentu pal que se tocan.

La campana yá s'utilizaba en tiempos de los faraones, pero foi muitos sieglos más tarde cuando s'estendió por tol mundu, a lo que contribuíu sobre manera l'espardimientu del cristianismu. Nas ilesias ya catedrales ya onde podemos atopar campanas de tolos tipos ya tamaños.

N'Asturias tenemos guapos campanarios ya campanas mui antiguas. Según un estudiu fechu pol valencianu Frances Llop, la campana de la catedral d'Uviéu, ya la más antigua de las esistentes n'España. Esta campana nomada Wamba foi construída nel añu 1219. Pero tenemos outras campanes singulares. Pol sou tamañu, la principal ya «La Gorda» de Toledo, que pesa «namás» que cuatro toneladas ya tien casi tres metros de diámetru. Viénseme a la meoria el guapu cantar popular que m'enseñóu, cuantayá, la mia maestra Gloria Fidalgo ya que cantábamos pa xugar al corru: «Para campana grande / la de Toledo / que caben siete sastres / ya un zapateru?». La más grande del mundu ya la de Kremlin de Moscú, que pesa 202 tonelaes, anque ta yá fendida dende la sua fabricación.

Sicasí la campana da pa muncho. Las campanas son dalgo inseparable del pueblu ya tienen un ciertu poder de misteriu. Yá dende l'antigüedá hai la creencia de que'l soníu tien un efeutu sobre la materia. El «ruíu» pue influir sobre la Naturaleza ya sobre ciertos fenómenos naturales que nel.la se producen. El toque de campanas, amás de sirvir pa danos información de misas, muertes, fiestas ya fueu, ente outras cousas, sirve pa facer fuxir la tronada. En muitas cultures de dixebraos l.lugares del mundu, ya tamién n'Asturias, recúrrese al toque de campanas pa escorrer los truenos. Ya, entovía fai pocos díes, cuando se celebró la conferencia sobre cambiu climáticu en Copenhague (Dinamarca), l' asociación humanitaria católica Cáritas Internacional ya el Consejo Mundial de Iglesias ficieron un l.lamáu a tolos los cristianos del mundu, pa que las campanas de los sous templos tañeran, como esixencia de «xusticia climática». Guapa manifestación a favor del nuestru Planeta.

Ante la desesperación de tolos peligros que nos amagan, entovía somos quién a recurrir nestos tiempos a la sabiduría popular, ya la campana conserva pa nós tol so poder máxicu.


GARCÍA LÓPEZ, María Esther

La Nueva España (29-12-2009)
  • OVIEDO: Campanes, campaners i tocs
  • Campanes (història general i tòpics): Bibliografia

     

  • Tornar cap enrere
  • Menu inicial CAMPANERS DE LA CATEDRAL DE VALÈNCIA
    Campaners de la Catedral de València
    Buscar campana, campanar, població, fonedor, epigrafia, any fosa, autor, article
    © La Nueva España (2009)
    © Campaners de la Catedral de València (2017)
    campaners@hotmail.com
    : 17-12-2017
    Convertir a PDF