15105 CARBALLO
| Descricion |
A igrexa de Santa María de Noicela ten a súa orixe no século XVI e ao longo dos séculos foi sufrindo sucesivas modificacións, motivo polo cal as características que chegaron ata nós son fundamentalmente barrocas. Posúe unha soa nave e unha ábsida, ambas con cuberta de madeira. Ó muro do presbiterio foille engadida unha sancristía, e a esta, máis recentemente, un segundo corpo que, na actualidade, funciona tamén como sancristía. O sistema construtivo é fundamentalmente a base de muros de carga. A cuberta posúe dúas augas cunha cubrición de tella curva do país. A fachada, na que se concentra a práctica totalidade da decoración, é de gran simetría e sobriedade. Posúe unha porta rectangular, con xambas enmarcadas e lintel moldurado, situándose sobre esta unha fornela que acolle á imaxe pétrea de Santa María (flanqueada por dous escudos) e un ha pequena fiestra rectangular que permite a entrada de luz natural ó coro. Os escudos da fachada con partición irregular contan coas armas dos Bermúdez de Castro, Andrade e Mariñas e outra co emblema da orde dos Agostiños, timbrado de capelo de abade. O seu sistema pentagonal característico interrómpese na cornixa, descompoñendo, así a simetría da fachada ó romperse para dar paso a unha torre-campanario. Dita torre componse de tres corpos superpostos; no inferior encóntrase o acceso ó campanario, que se efectúa a través dunhas escaleiras apegadas ó muro lateral. O corpo intermedio está formado por catro machóns unidos por arcos de medio punto e decoración de molduras, mentres que o superior, ou de remate, resólvese nunha pequena cúpula flanqueada por catro pináculos, rematando o conxunto cunha cruz sobre unha bóla. Como noutras igrexas do rural galego, aparece o cemiterio dentro do recinto do adro, formando un conxunto onde conviven a parroquia dos mortos e a parroquia dos vivos. |
|---|---|
| Campás | 2 campás. |
| Autor | |
Bibliografía (Pódese ordenar por calquera dos campos)
| Autor | Título | Data |
|---|---|---|
| CARBALLO | Sen pistas da campá de Noicela | 2013 |
| CASANOVA, Jorge | Las campanas robadas en Galicia se venden al peso, a menudo en Portugal | 2017 |
| MURADO, Miguel-Anxo | As campás roubadas | 2017 |
| RAMOS LAVANDEIRA, José Manuel | Bendición de San Antón para sesenta mascotas en Carballo | 2017 |
Vídeo (Pódese ordenar por calquera dos campos)
| Persoa | Vídeo | Data | Duración |
|---|---|---|---|
| VARELA VARELA, PABLO | Primeiro toque a misa de domingo | 26-03-2026 | 03:35 |
